കോട്ടയം: സംസ്ഥാനത്ത് മഴക്കെടുതി അതിരൂക്ഷം. ഇതുവരെ ആറ് മരണമാണ് സ്ഥിരീകരിച്ചത്. പൂഞ്ഞാര് തെക്കേക്കര പയ്യാനിത്തോട്ടത്തില് 24കാരനായ ജോസഫിന് ജോണി മരിച്ചത് അപകടത്തില് കാലിന് പരിക്കേറ്റ് വീട്ടില് കഴിയുന്നതിന് ഇടയിലാണ്. വിശ്രമത്തിലിരിക്കവേയാണ് ജോസഫിനെ ഉരുളെടുത്തത്. അപകടത്തില് ജോസഫിന്റെ മാതാവ് റെജീനയും മരിച്ചിരുന്നു. സംഭവസമയം പിതാവ് എം ജെ ജോണി അടുത്ത വീട്ടിലായിരുന്നതിനാല് തലനാരിഴയ്ക്ക് രക്ഷപ്പെടുകയായിരുന്നു. പെണ്മക്കളായ ജോമിറ്റും സോമിറ്റും വീട്ടിലുണ്ടായിരുന്നില്ല.
ചൂണ്ടച്ചേരി എഞ്ചിനീയറിങ് കോളേജ് കാന്റീന് ജീവനക്കാരനാണ് ജോസഫിന് ജോണി. കഴിഞ്ഞ മാസമാണ് ഈരാറ്റുപേട്ടയില് വെച്ചുണ്ടായ അപകടത്തില് കാലിന് പരിക്കേറ്റത്. റെജീന പയ്യാനിത്തോട്ടം ഹോളിസ്പിരിറ്റ് സ്കൂളിലെ ജീവനക്കാരിയാണ്. ഇടമല ഭാഗത്ത് നിന്ന് വന്ന ഉരുളാണ് അമ്മയുടേയും മകന്റെയും ജീവന് കവര്ന്നത്.
അതേസമയം തിരുവാലി എറിയാട് കണ്ടമംഗലത്ത് തോട്ടിലെ ഒഴുക്കില്പ്പെട്ട് രണ്ടര വയസുകാരന് മരിച്ചു. അബ്ദുല് മുനീറിന്റെ മകന് അബ്ദുല് മുഹൈനി ആണ് മരിച്ചത്. ആലപ്പുഴയില് നിന്നും മാതാവിന്റെ വീട്ടിലേക്ക് വിരുന്ന് വന്ന കുട്ടി ഇന്ന് ഉച്ചയോടെയാണ് അപകടത്തില്പ്പെട്ടത്. കുട്ടി തോട്ടില് വീണ് ഒഴുക്കില് പെട്ടത് കണ്ടെങ്കിലും സ്ലാബുകള് മൂടിയ തോടായതിനാല് രക്ഷപ്പെടുത്താനായില്ല. ഫയര്ഫോഴ്സ് ജീവനക്കാരും നാട്ടുകാരും ഏറെ സമയം നടത്തിയ തിരച്ചിലിനൊടുവിലാണ് കുട്ടിയെ കണ്ടെത്തിയത്.
വാകത്താനം ചക്കന് ചിറയില് വെള്ളക്കെട്ടില് വീണ് 11 വയസുകാരനും ജീവന് നഷ്ടമായിരുന്നു. കാട്ടാമ്പാക്കില് ഷിജുവിന്റെ മകന് മിലന് കെ ഷിജു (11) ആണ് മരിച്ചത്. വീടിന് സമീപം ജല് ജീവന് മിഷന്റെ വാട്ടര് ടാങ്കിന് വേണ്ടി കുഴിയെടുത്തതില് ഉണ്ടായ വെള്ളക്കെട്ടില് വീണാണ് അപകടം ഉണ്ടായത്. സഹോദരിയോടൊപ്പം കുളിച്ച് കൊണ്ടിരുന്നപ്പോള് പെട്ടന്ന് താഴ്ന്ന് പോവുകയായിരുന്നുവെന്നാണ് വിവരം. മലപ്പുറം കൊണ്ടോട്ടിയില് നാല് വയസുകാരന് ഒഴുക്കില് പെട്ട് മരിച്ചിരുന്നു. മേലേപ്പറമ്പ് മങ്ങാട്ടുപറമ്പ് അബ്ദുല് ഹമീദിന്റെ മകന് ആദം ഐമന് ആണ് മരിച്ചത്. തോട്ടില് ജലനിരപ്പ് വലിയതോതില് ഉയര്ന്നിരുന്നു. മുതുവല്ലൂര് സ്കൂളില് എല്കെജി വിദ്യാര്ഥിയാണ് ആദം. നാട്ടുകാര് ഉടന് ആശുപത്രിയില് എത്തിച്ചെങ്കിലും രക്ഷിക്കാനായില്ല.
കുട്ടിയുടെ മൃതദേഹം നിലവില് കൊണ്ടോട്ടിയിലെ സ്വകാര്യ ആശുപത്രിയില് സൂക്ഷിച്ചിരിക്കുകയാണ്. തോടിന്റെ കരയിലൂടെ നടക്കുന്നതിനിടെ അബദ്ധത്തില് വെള്ളത്തിലേക്ക് വീണതാകാമെന്നാണ് പ്രാഥമിക നിഗമനം. അതേസമയം സംസ്ഥാനത്തെ മഴക്കെടുതി സാഹചര്യം മുഖ്യമന്ത്രി വി ഡി സതീശന് വിലയിരുത്തി. ജില്ലകളുടെ ചുമതലയുള്ള മന്ത്രിമാരോട് അതത് ജില്ലകളില് ക്യാമ്പ് ചെയ്യാനും ദുരിതാശ്വാസ പ്രവര്ത്തനങ്ങള് ഏകോപിപ്പിക്കാനും നിര്ദേശം നല്കിയിട്ടുണ്ട്. തിരുവനന്തപുരത്ത് സി പി ജോണും പത്തനംതിട്ടയില് പി സി വിഷ്ണുനാഥും കോട്ടയത്ത് മോന്സ് ജോസഫും ഇടുക്കിയില് അനൂപ് ജേക്കബും ക്യാമ്പ് ചെയ്യും. ദുരിതാശ്വാസ പ്രവര്ത്തനങ്ങളുടെ സംസ്ഥാനതല ഏകോപനം റവന്യൂ മന്ത്രി നിര്വഹിക്കും.
മഴക്കെടുതി രൂക്ഷമായ മേഖലകളിലെ എംഎല്എമാരുമായും മുഖ്യമന്ത്രി ഫോണില് സംസാരിച്ചു. ഇടുക്കി, പത്തനംതിട്ട, കോട്ടയം കളക്ടര്മാര്ക്ക് ഏത് അടിയന്തര സാഹചര്യവും നേരിടാന് സജ്ജമായിരിക്കാനുള്ള നിര്ദേശവും നല്കി. രണ്ട് പേരെ കാണാതായ തിരുവനന്തപുരം മുതലപ്പൊഴിയില് കോസ്റ്റ് ഗാര്ഡിന്റെ വെസല് ഉള്ക്കടലില് തിരച്ചില് നടത്തുന്നുണ്ട്. മറൈന് എന്ഫോഴ്സ്മെന്റ് സംഘവും സ്ഥലത്തുണ്ട്.
Content Highlights: Joseph Johnny, a 24-year-old resident of Payyanithottam in Poonjar Thekkekkara, Idukki, passed away while recovering at home after sustaining a leg injury in an accident